EWLEDA EZDAYÎ
Helbestvan: Siltana Memê
Gelek dûrim ji wê kanya dilan,
Ku diwelide her bahar gulan,
Xemla Sor-Sipî, gulave bêhnxweş,
Bi reng Êzdîxan, pîroze dîlan.
Ji çûriska Nûr, mêze kir tima,
Ax dihelim ez, bûme wek şima,
Huba merd hewas, têr-tijî berxweş,
Wê hemêzê da, gulim ez çima?
Axîn min kûr wek, gelyê Şengale,
Evîn agire, hestî bê hale,
Siltanê vehûn, bê car û nexweş,
Bi deng Adebî sewd galegale.
Dilê naz xweza, werger û demsal,
Bi xêz û boyax, neqişand wê sal,
Bandora gulgeş, firnaxim kêfxweş,
Min ji xwe ra bir, warê Bav û Kal.
Şengal dîroke, beyt rêz bi rêze,
Lênûsk kevnare bi hewil hêze,
Hey xwendevano, bilbilê serxweş,
Bixwîne aza, maf biparêze.
Him dihûrikim, him diherikim,
Vê kêş û meşê, belkî sebrekim,
Qelema min qenc, bisêwrîne xweş,
Ji Nûra Ezday, ez ewledekim.
13.07.2025s.
XELAT
