Du Helbest Ji Hasan Kordede

Helbest: Hasan Kordede

Yar nayête dest bi lava?

Tu mi nabînî bi çavê xwe

Tu mi nakî hindirê dilê xwe

De tu min bike kil bo çavê xwe

Mizgînê bide dê û bavê xwe..

Mizgîna çi kuro tu dil germî

Te kenê min dît bi rûkê nermî

Ew bi xwe bin hestî û ser çermî

De were pesna xwe bide b'fermî..

Keçê ma dil çi zanê bil eşqê

Gava ku hez ke guh nade şewqê

Wek ca'inî yê xam zû diterqê

De tu hefsarke dema bişeqê..

Ez ne seyisim nizanim ce'inî

Qey tu wek dîna bi hiş dikenî

De bese derkev ji wî fût fenî

Dil bi xwe wek bîra kûr bê binî..

Benê te xave di bîr wer kirim

Bi saxî girtim nişka dimirim

Ber daxa vînê wek bêçar kirim

Rêka wenda bû ez pêde birim..

Dîno eve vîn rêka bê dawî

Wek rêk wenda be tîna bixawî

Mînanî saxlem nişka bî bawî

Agirê gurre sotî b'alawî..

Sohtim te ez bi agrê çava

Xapandim dînê her dem û gava

Bese dikêşim jînê bi lava

Carek ronîke wek heyv û tava..

Kuro bi lava yar nayête dest

Xebat girînge gava dil kî qest

Ez li benda te her dijîm sermest

Bese gotinan tu bikî helbest..

26/05/2024-Serzorî

Wêne Fewzi Bilge

------------------------------------------------

Wek te nînin melek?

Ez gerîyam roj û şev

Sal bihurîn şêst û yek

Erd û ezman tev da hev

Nedîn wek te çav belek..

Nedîn wek te xumarî

Pir nazik û kubarî

Tu ji ber çavan tew narî

Em ketin tora felek..

Em ketin gêjgerîn kê

Xapandîne zivîn kê

Bila dewran bi vîn kê

Çerx û dolapên melek..

Di deryan te wer kirim

Ne vejîyam ne mirim

Ez nikarim vegerim

Ne gemîme ne kelek..

Ne bahoz û tofanim

Wek pilingê çîyanim

Aşiqê kurdistanim

Dem û dewran bê henek..

Dem û dewran bihurîn

Çirên rastî temirîn

Beko ewan gemirîn

Bi serketin ên çilek..

Dijmin çendî hovane

Geh şûre geh îmane

Fen û fût û dewrane

Ser qeter bûne kulek..

Meya kirne bazare

Sermîyan bûn etare

Bûm kirine simsare

Heyfa kezyên bi xelek..

Bêçarim ji van derdan

Min hestê xwe tê berdan

Dinya fanî tê werdan

Hişyar nebûn hîn gelek..

25/05/2024-Serzorî

XELAT