Danberheva Baqî Berûkî û Dilbikul Cizîrî
Helbestvan: Dilbikul Cizîrî û Baqî Berûkî
Were Bilbil Ez û Tu
Were bilbil ez û tu
Bixwînin em di gel hev
Bikin arî hevûdû
Ji siharê heta şev
Cizîrî
Ez bilbilek bê war im
Ji sorgulê bêpar im
Pîşt xûz û giranbar im
Min ne roj e ne jî şev
Berûkî
Bikin behsa evînê
Teşbîhê Mem û Zînê
Gorî bikin vê jînê
Dem biborit holê tev
Cizîrî
Ji evînê min bes e
Ne vîn ma ne hewes e
Li min ma yek nefes e
Dem û wext dane serhev
Berûkî
Ya te sorgul ya min yar
Tu xulxul ke, ez hawar
Hewa germ be, yan jî sar
Esla nebit bo me rev
Cizîrî
Sorgula min çilmisî
Sewta bilbil fetisî
Dev û didan qerisî
Lewra dikim bez û rev
Berûkî
Em bi hev ra bibêjin
Cerg û dilan bipêjin
Rondikên xwîn birêjin
Heta em kor bikin çev
Cizîrî
Ji gotinan bûme gêj
Cergêm helîya ji mêj
J'girî çavêm şile hêj
Lew kor bûm ji her du çev
Berûkî
Tu ser darê, ez bin de
Bisojin wekî find e
Car car bikin gazind e
Weslê bixwazin ser hev
Cizîrî
Hişk bûye ew dara min
Şewq nade çiraya min
Gazind ne ji yara min
Bes em negihîştin hev
Berûkî
Yên te pirr in, ya min yek
Qamet-elîf, çav-belek
Bawer nekî ka wer fek
Bêjî qey horî ye ev
Cizîrî
Yên mi çar in bêguman
Her çar yekin ji yek xan
Kes ji min nekin loman
Her çar ji bo min wek hev
Berûkî
Ez Dilkul, tu birîndar
Lê em herdu evîndar
Bo demê bin goyîndar
Ta yar bo me bit gihev
Cizîrî
Baqî wek bilbilek lal
J'hesreta yara şepal
Wekî pepûkê melal
Awaza dide berhev
Berûkî.
Cizîr-Sêrt.
XELAT
