Piştî 27 salan pirtûka xwe a zimanê kurdî îmze kir

Nivîskar û zimanzanê Kurd ê Rojavayê Kurdistanê (Deham Ebdulfettah) pirtûka xwe a 'Zimanê Kurdî' ku berya 27 salan ji aliyê rêjîma Baasê ve hatibû desteser kirin bi şahiyekê îmza kir.

Bi amadebûna hêjmarek nivîskar, rewşenbîr, hunermed û siyasetmedaran, Yekitiya Rewşenbîrên kantona Cizîrê li bajarê Hesekê şahiyeke îmzekirina pirtûka bi navê 'Zimanê Kurdî' a ku ji aliyê nivîskar Deham Ebdulfetah ve hatiye nivîsandin lidarxist.

Di wê derbarê de nivîskar Deham Ebdulfetah behsa çîroka nivîsandina pirtûka xwe kir û da zanîn ku pirtûka ku beriya 27 salan ji aliyê rejîma Baasê ve hatibû desteserkirin, piştî hilweşîna wê derfeta çapkirinê dîtiye. Di dawiya şahiyê de pirtûk ji aliye Deham Ebdulfetah ve hate îmzekirin û li xwîneran hat belavkirin.

Deham Ebdulfetah, nivîskar û zimanzan di sala 1942'yan de li gundê Billê yê Amûdê ji dayik bûye. Xwendina xwe ya seretayî, navîn û amadeyî li dibistanên Amûdê û Hesekê qedandiye. Derçûyê Zanîngeha Helebê, Beşa Ziman û Wêjeya Erebî ye. Nêzî 25 salan wek mamosteyê ziman û wêjeya erebî kar kiriye. Dûre destê xwe ji karmendiyê kişandiye û xwe daye kar û barên zimanê Kurdî. Di destpêkê de helbest û gotarên xwe bi zimanê erebî nivîsandine û di rojname û kovarên erebî de belav kirine. Nêzî 10 salan bi xwendin, danehev û liberhevxistina ziman û rêzimana kurdî daket. Di sala 1988'an de dest bi nivîsîna bi zimanê xwe kir û hêj li ser wê rêbazê berdewam e.

Xelat/Anha