Serokê YNK: Piştevaniya birayê birêz Mezlûm Ebdî dikim

Serokê Yekîtiya Nîştimanî ya Kurdistanê (YNK) Bafil Celal Talebanî bi peyamekê piştevanî û piştgîriya xwe ji rêkeftina di navbera Fermandarê giştî yê HSDê Mezlûm Ebdî û serokê demkî yê Sûriyê Ehmed Şerih kir û da zanîn ku ew weke her car piştevaniya hewlên birayê xwe Mezlûm Ebdî dike.

Eve jî naveroka peyama Serokê YNK`ê:

 "Bi germî pêşwaziyê li rêkeftina birêz Mazlûm Ebdî û Ehmed Şer’i dikim.

Ev yek gaveke girîng û erênî ji bo xortkirina jiyan û xebata hevpar di Sûriyeya nû de ye.

Ev yek rêya herî rast e ku aramiya siyasî û ewlekariyê bi xwe re tîne û me ji destpêkê daxwaza wê kir û em ji bo wê xebitîn.

Ev gav ku mafê gelê me li Rojava û hemû pêkhateyan diparêze, em hêvî dikin bibe destpêkeka nû ji bo avakirina welatek demokratîk û li ser daxwaziya gel ku destûr bingeha xebat û hevpariyê be.

Weke hertim em ê piştevanê birayê birêz Mazlûm Ebdî ji bo bicihkirina aştî û aramiyê li navçeyê bin."

Bafil Celal Talebanî

Serokê Yekîtiya Nîştimaniya Kurdistanê

**********

Hêjayê gotinê ye ku roja 10/3/2025 Fermandarê Giştî yê Hêzên Sûriya Demokratîk (HSD) Mezlûm Ebdî û serokê desthilata Şamê Ehmed El Şerih rêkeftineke giring îmze kirin.

Li gorî naveroka rêkeftinê ku hatiye belavkirin û di dawiyê de Fermandarê Giştî yê HSD’ê Mêzlûm Ebdî  û Ehmed El Şerih ve îmze kirine, ji 8 bendan pêk tê û wiha ye:

1-Bêyî ku li ol û neteweya gelên Sûriyeyê bê nêrin, di nava hemû pêvajoyên siyasî û saziyên dewletê de bi awayek erkdarî û berpirsyariya wekhev temsîl bikin û mafên wan bên misogerkirin.

2-Civaka Kurd, civakeke xwecihî ya dewleta Sûriyê ye û dewleta Sûriyeyê hemwelatîbûn û hemû mafên destûra bingehîn misoger dike.

3-Li seranserê Sûriyeyê agirbest bê ragihandin.

4-Hemû saziyên sivîl û leşkerî yên Bakur û Rojhilatê Sûriyeyê, deriyên sînor, balafirgeh, qadên petrol û gaza xwezayî entegreyî rêveberiya dewleta Sûriyeyê bê kirin.

5-Sûriyiyên ku ji cih û warê xwe hatine derxistin, wê vegerin gund û bajarên xwe û ji hêla dewleta Sûriyeyê ve bên parastin.

6-Têkoşîna dewleta Sûriyeyê ya li dijî bermahiyên Esed û hemû metirsiyên li ser ewlekarî û yekîtiya wê were destekkirin.

7-Em hemû gotinên nefretê û hewlên belavkirina fitne û bangên ku dubendiyê dixin navbera hemû pêkhateyên civaka Sûriyeyê red dikin.

8-Komîteyên Rêveber ji bo pêkanîna peymanê herî dereng heta dawiya salê xebatên xwe bidomînin.

XELAT