EZ Û DIL
Helbestvan: Baqîyê Berûkî
Mefaîlun mefaîlun
- / / / - / / /
Dilo kengê tu yê şa bî
Çima ewqas tu xembarî?
Şev û roj qet hedar nabî
Hema herdem bi zar-zarî.
Evê qîrê evî dengê
Dikî daîm bi vê rengê
Girî û şîn heta kengê
Gelo nabî fihêtkarî?
Wekî heyva li bin ewran
Reş û tarî wekî qetran
Dibarî her wekî baran
Ji van çavê elemdarî
Li sîngêm radikî ferman
Li hêla çep te kir talan
Milê rastê nema derman
Ji vê zilmê gunehkarî.
Gunehkarî ji vê zilmê
Tu yê kengê bibî fêhmê
Li vî jarî bikî rehmê
Te carek b'min nekir yarî
Nedî kes ev li dewranê
Li xo rakî tu fermanê
Nema taqet li vî canê
Ji vê rewşê tewanbarî
Çi bes nakî ji vê ketmê?
Kezeb mêlak te bir edmê
Dixwînî her wekî xitmê
Li vî sîngê birîndarî.
Çima ewqas giran nefsî
Ji keyfêra tu bênefsî
Te ez xistim li nav hepsî
Geda ez, her tu xunkarî.
Eva çil sal bi vî halî
Emir çû ha bibit talî
Bi çend roj ma biçim çalî
Nema êdî wefadarî.
Gelo ma qey tu bê warî?
Ji ber wê hinde zar-zarî
Kesek nînin bikit arî
Li vî dinya reş û tarî
Dilo bes her melaqî tu
Dikî xedrê li "Baqî" tu
Gelo nûra şefaqî tu?
Tu qet nakî fedakarî.
Sêrt.
Xelat
