Vegere EFRÎNA Dilê Xwe!
Helbest: Husên M. Hebeş (Hussein Habasch)
Vegere
Vegere
Vegere wê axa pîroz
Wê axa bi rûmet
Wê axa ku rojekê ji rojan
Xweda bi zimanê Kurdî lê axifiye!
Vegere
Vegere
Vegere wê axa ku bi şîrê dayikan hatiye sitran
bi xwîdana bavan hatiye mizdan
û bi xwîna şehîdan hatiye avdan.
Vegere
Vegere
Vegere da ku tu ji nû ve xwe
bi kenê darên zeytûnan bixemilînî
Xwe ji nû ve bi qirm û rehên wan ve bialînî
Xwe ji nû ve bi şaxên wan binivîsînî
û ciwaniya xwe ji nû ve vegerînî.
Vegera
Vegera
Vegere, hestên xwe li bin wan darên hêvîdan raxîne
û nimêje zeyt û zeytûnan nimêj bike.
Vegere
Vegere
Vegere EFRÎNA xwe ya bejinbilind
Bi roka wê ya azad û germik,
birînên xwe derman bike
û bayê wê yê pak û hênik
di henaseyên xwe de bimeyine.
Vegere
Vegere
Vegera û baweriya xwe tenê bi ezmanê wê bike
Tênê bi deşt û çiyayên wê bike
Tenê bi daristan û zeviyên wê bike
Tenê bi hebûna û hemdemiya wê bike.
Vegere
Vegere
Vegere, govend û dîlanên azadiyê
li ser bêderên wê bigerîne
bê westandin bigerîne
her dem bigerîne...
Vegere
Vegere
Vegera EFRÎNA dilê xwe
da ku tu ji nû ve bibî Xweda!
Xelat
