BIHARA ME ÇÛ
Helbest: Baqî Berûkî
BIHARA ME ÇÛ.
Bihara me çû payiz hat
Vaye hişk bûn dar û nebat
Me ji xwe re nekir xebat
Piştî payizê zivistan
Ne gul man ne jî gulistan
Çilmisî baxê dilistan
Kulîlkên baxê me firîn
Bilbil ji gulan xeyirîn- (xeyidîn)
Bhara çûyî nayê kirîn
Ciwanî çû bi erzanî
Me qîmetê wî nezanî
Em ketine derdê canî
Umir borî di keyfê de
Me qîm pê anî pirr zêde
Niha mane nîvê rê de
Me digo em ter û ciwanî
Ma hêj ne zû ye ezbenî?
Dinya li halê me kenî
Umrê çûyî êdî nayê
Keyf û lezzeta dinyayê
Wekî kayê bidî bayê
Em ketin xewn û xeyalan
Salan umrê me kir talan
Hew me dît em bûn ji kalan
Rê gelek dûr û dirêje
Çeltkê me tejî qirêje
Rêwîtiya me bê çêje
Me xîm danî li ser kayê
Me nekir hesabê bayê
Me xêr nedît j'wê serayê
Yên digotin em xweşmêrin
Xwedîyê pere û zêrin
Niha bêxêr û bêkêr in
Em ketin l'ber derdê malê
Şev û roj û meh û salê
Me danegirt qutê çalê
J'bo dinê bûn serxweş û mest
Çi helal çi heram me gest
Me ji bîrkir soza elest
Hevîr tirş bûye dirêje
Tenûr sar bûye ji mêje
Keremke nanî bipêje
Heval çar hezar û çar in
Dost yek e dijmin hezar in
Vir û hîle bar bi bar in
Ger ez bêjim hêj pirr mane
Serpêhatiyên salan e
Barê me gelek giran e
Baqî de ka bes dirêj ke
Heval û hogiran gêj ke
Dilê xwe j'zengê paqij ke.
13/11/2025~Sêrt.
Xelat
