NAMEYA XANÎ
Helbestvan: Ebdurehim İnanç
Mefaîlun mefaîlun feûlun
Werin Xanî tu dermanê me yî, can
Tu Luqmanî ji bo êşan û derdan
Di helbestê gelek zana û jîr i
Di ilmê ‘eşq û vînê da xebîr î
Dixwazim nameyek bona te rêkim
Belê namê bi misk û mawerê kim
Eman Seyda Xwedêkî da emanet
Li min negrin tu car nakim xiyanet
Ku bêjim ez hinek tiştên ji dil bên
Bi êş bin ew ji kovanê qizil bên
Kelamê min dema sor bin bisojin
Bizan pêşî hinavê min dikojin
Dizanî her felek fetl û bi kîn e
Hema daîm di gel ma qetl û xwîn e
Dema bêjî Memê rastî birîndar
Bikî behsa Zîna ma bû pirî jar
Bizan herdû di gel hev payidar in
Belayên wan dizanî bêjimar in
Bekir daim li meydanê bi lez tên
Heval û hogirên wî jî bi bez tên
Te hew dî yar û yaran jev qetandin
Xweşî carek ji nav dil da revandin
Delala şeng te dil da ew hebandî
Direxta naz û nazdarî te çandî
Gulistana di bin birca Şeref Xan
Di destê nakesan da bûye wêran
Xebînet va di destê bûm xerab e
Heroj sed car dikêşit ew ‘ezab e
Diz û piz lê dikin seyd û Cirîda
Di bin sulta ne pakan û pedîda
Xezîna ket di destê dîn betala
Lewa îro tu nabînî delala
Werin carek bi jorda lê binêrin
Hinavê xwû li ber bayê bidêrin
Gula narîn dibînî pir û par e
Ne rewşa wê ne jî bin jê diyar e
Bi vê rewşê jiyan çendî ku ar e
Belê ev ar “ li xelqê namîdar e”
Mi dî Xanî cewab da min giranî
Ji nav gorê dema wî ser hilanî
Di got bêje birayo! Dil birîno
Kelamê xweş dikî gelkê şirîno
Dizanim ez belê ev hal xerabe
Jîna hûn tê hemû jan û şitabe
Keser hatê ji kovanên dilê wî
Dizanî wî çima em mane sêwî
Ne xwendanîn ji bo hev xêr nexwaz in
Ne zanan în hama daîm tinaz in
Xemên dilda bi carek em vejînîn
Kulên salan bi yek carê derînîn
Xwedî par bîn di nava vê civakê
Xelas bîn em ji talan û helakê
Di destê ma te dî pul va biha bû
Rewac dît û di âlem ew bela bû
Te hew dî va hemû warkûz heşînin
Hemû ‘êl û ‘eşîr va lê dimînin
Mem ê jar û reben hew dî ku rabûn
Wekî her kes tereb û kêf û şa bûn
Hema herkes di gel yara xwe ra bûn
Di gel dilber ku “ keyfe ma teşa” bûn
Ne iblis man ne fesad man li holê
Hema lêxin ney û saz û deholê
Dema rewşa xerab carek me avêt
Kulên salan hemû tevda bi der bêt
Hemû tevda bijîn em Kurdewarî
Bijîn şadî hema her xwendekarî
Ku “Behmûrî” gihayî vê muradê
Wekî xelqê bibînî ‘edl û dadê
Mirin ‘heq bê gelek jî em pê xwûş în
Mudamî em bi cûş û dil xwurûş în
15/04/2024 Cizîr
XELAT
