SEBEB TU YÎ
Helbestvan: Ayhan Demir
Çavêm mîna heba tirya
Ne dinhêrî zindî mirya
Bi roj bi şev xwîn digirya
Aşbûna min sebeb tu yî
Nexweş im lê ez namirim
Dil şewat im, dil agir im
Reng û rûçik diqehirim
Reşbûna min sebeb tu yî
Cerg û kezeb bikim pola
Xwe berdim nav deşt û çola
Ku dûr kevim j’gulan gul a
Şaşbûna min sebeb tu yî
Min keştand ew dar û gopal
Bûme xortê bîst û sîh sal
Rabûye derd û nale-nal
Başbûna min sebeb tu yî
Mîna Ferad xweş dikişim
Aşiqê gula binevş im
Wek keskesor dinexişim
Geşbûna min sebeb tu yî
Bûme bilbil guling û baz
Bext û miraz bilûr û saz
Kilam miqam sewt û awaz
Coşbûna min sebeb tu yî
Min da serhev derd û birîn
Bûme sewda eşq û evîn
Berê tehl bûm niha şirîn
Xweşbûna min sebeb tu yî
Ayhan Demir
23.02.2025 Kantonspital/Chur
Ez wê helbestê dîyarî mamosta dilovan, dayîka Hinar dikim.
Rojbûna te bi dil û can pîroz dikim. Ji dayîka xwe ra emrêkî dirêj, tenduristî dixwezim û destê te radimûsim.
XELAT
