ÇIRÛSKA NETEMIRÎ
Helbestvan: Siltana Memê
Çirûsk-çirak li ezmana, birq veda û hêwirî,
Jê xuliqîn hezar boyax, cîhan rengîn sêwirî
Govend girtin sterkên recal, bû sergovend hîvero,
Bû şemala şeva terî, çira-agir nemirî.
Find-fenera şewq veda bûn, li wê zerya erşê jor,
Diteyîsîn zêr û zîvîn, tawaz-tawaz dor bi dor,
Dimilmilî nermê tûklî, rengê hubrê terîstan,
Dixulxulî jîyan şevê ronahî lê bibû mor.
Ji şemdanê nûr dipekya, çûrisk hûr-hûr dibaryan,
Dibûn birqok şehra terî, hêdî-hêdî digeryan,
Rewşa şevê dixemilî, mînanî eyd û cejnê,
Keçên Kezî Perezêrîn, bi deng, stran difiryan.
Li çîroka şeva pîroz, min jî xwe ra kir guhdar,
Temaşe kir reşî-ronyê, hub û hestên evîndar,
Nûr-nedera netemirî, bûka naze şevînê,
Himaîle bindarûkê, de keremkin mêvandar.
15.10.2025s
Xelat
