"Nivîskarên Kurd hene zarokên wan bi Kurdî nizanin"
Nivîskar û çîroknivîsa jin a kurd (Çîdem Baran) dibejê ku, hindek nivîskarên me yên kurd hene ku heya niha zarokên wan bi zimanê dayîka xwe nizanin biaxivin.
Di hevpeyvînekê de bi rojnameya Kurdistanî Nwê re, Çîdem Baran dibêje: Ji zarokatiya xwe ve hezkirina min û kêfa min ji karê hunerî ya şêwekariyê re hebûye, lê piştre min dest bi nivîsandina kurte çîrokan û romanan kiriye.
Baran dibêje: Yekem romana xwe, min di sala 2011`an de bi navê (Li Peravên Torê – Torên Evînê) nivîsandiye, û her weha çend roman û çîrok jî min nivîsîne.
Behsa wê yekê jî dike ku wê romaneka xwe nivîsiye ku behsa jiyana serokeka jin a yek ji êlên Kurd ên devera Mêrdînê ya Bakûrê Kurdistanê bûye û bandorek mezin li ser wê kiriye. Roman bi zimanê kurdî ya tîpên latînî bûye û armanca sereke ji nivisîna wê romanê xizmetkirina zimanê kurdî bûye.
Çîdem Baran dibêje; ez aşiqê zimanê Kurdî û zimanê dayîkê me, çûnkî rewşa zimanê kurdî li bakûrê Kurdistanê baş nîne û ez neçarim xebatê ji bo parastina zimanê Kurdî bikim.
Diyar jî dike ku ew bi xwe mamostayê dewletê ye û çendîn waneyên kurdî ji xwendevan û fêrxwazên zimanê kurdî re gotine û kar û armanca wê xizmetkirina zimanê dayîkê ye û ew bi karên xwe gelekî dilxweşe.
Balê dikşîne ser wê yekê jî Çîdem dibêje ku, hindek nivîskarên kurd hene ku çendîn pirtukên wan ên kurdî hene lê mixabin zarokên wan nizanin bi zimanê dayîka xwe biaxivin yan pirtûkên bavê û dayîkên xwe yên nivîskar bixwînin ku eve jî karesate û divê armanc ji nivîsînê pêşxistin û parastina zimanê kurdî be.
Derbarê karê wê yê şêwekariyê de jî Çîdem got: Min çendîn pêşangeh li welatên Ewropa û li bakûrê Kurdistanê vekirine û demekê jî ji bo nîgarkêşiyê li zanîngeha Dîcle kar kiriye .
Çîdem Baran di sala 1985`an de li bajaroka Mîdyatê ya ser bi Mêrdînê jidayîk bûye, xwendina xwe ya seretayî û navendî li bajarê xwe temam kiriye û di sala 2018`an li zanîngeha Dîcle li Amedê bawernameya beşa şêwekarî bidest xistiye ji bilî ezmûna nivîsînê jî çendîn çalakiyên hunerî li bakûrê Kurdistanê û Almanyayê hene.
XELAT/ Kurdistanî Nwê
