Di pêşerojan de
Helbest: Mihemed Hemkoçer
Di pêşerojan de
Paşeroj aşkere dibin!
Dema demên lalik
Bi ziman dibin
Û paşelên pirtûkên qedexe
Hildiweşin..
Mînî (Kursîyek Lixwenanê)
Li keniştek mezin
Û Keşîşekî qert
Her kesekî vedipirsîne
Saw dikeve dilê mirovan
Mirovên durû
Yên dewre
Û berarkî
Ser bûyeran dipeçinîn
Berge namîne
Ji bincilkirinê re
Ji binfîskirinê re
Ji nadarkirina rastiyê
Û becewîşkirinê re
Fersend tune ye
Di pêşerojan de
Ziman in kin dibin
Û dev in bi ziman dibin
Çav in kor dibin
Û kor in bi çav dibin
Siya mirov li ser gawahiyan dide!
Dema nîrê tirsê
Dikeve stûyan
Xet û xêz
Rasterast derdikevin
Û hevcar bi ber qulpan dikeve
Lupdanê bi ser dikevin
Qulpên bêhêk û hêlîn
Reprût dibin
Û motika holmanan
Holmanên celq
Û kesên civiq
Dikin vit-vit
Dikin nakin ku erd veqelişe û xwe têxinê
Ku dem vegere
Û xwe bigerwin
Û bêjin: bêjîyên zemên in
Xelat
