Îro bîranîna koça dawî ya Hunermend Mihemed Şêxo ye
Îro bîranîna 36mîn salvegera koça dawî ya hunermendê navdar ê kurd û Kurdistanê rewanşad Mehemed Şêxo ye.
Hunermendê Kurd ê navdar û mezin rewanşad Mihemed Şêxo, di 36’emîn salvegera koça dawî de ji aliyê gelê kurd ve tê bibîranîn.
Mihemed Şêxo ku di dilê hemû Kurdan de cihê xwe girtiye, di sala 1948’an de li gundê Girbawî yê girêdayî bajarê Qamişlo ji dayik bû ye.
Navê wî yê rastî Mihemed Salihê Şêxmûsê Ehmed e. Di zarokatiya wî de malbata wî koçber dibe û li gundê Xecokê bi cîh dibe.
Hunermendê ku di jiyana xwe de, gelek êş kişand û li gel van êşên xwe êş û kederên doza welatê xwe, her wiha hesreta xwe ya welatekî azad di stranên xwe de anîna ser ziman, Rewanşad Mihemed Şêxo di dilê nifşên nû yên Rojavayê Kurdistanê de her zindî dimîne.
Di sala 1959´an de dest bi xwendinê dike, lê di sala 1967’an de, ji ber sedemên abûrî û êşa çavên xwe dest ji xwendinê berdide.
Di dawiya sala 1969’an de diçe paytexta Lubnanê Beyrutê û di sala 1972’yan de dibe endamê Hevgirtina Hunermendên Lubnanê.
Di sala 1972’yan de vedigere Rojavayê Kurdistanê û bi çend hevalên xwe re komek muzîkê ava dike û tevlî şahî û pîrozbahiyên Newrozan dibe. Êdî hêdî hêdî navê Şêxo di nava gel de belav dibe.
Şêxo ji ber rejîmê di dawiya sala 1972’yan de diçe Başûrê Kurdistanê û ji wir jî diçe Bexdayê. Strana xwe ya yekemîn a bi nave “Baxçê Gula” li wir çêdike. Mihemed Şêxo piştre dîsa vedigere Qamişlo, lê rastî gelek pêkutiyên rejîmê tê û tê girtin.
Piştî peymana Cezayîrê û têkçûna serhildana Kurdan, Şêxo jî diçe Rojhilatê Kurdistanê û piştî kû demekê li kampa penaberan dimîne, li Mahabatê bicîh dibe.
Hunermend Şêxo ku di 1983’yan de vedigere Qamişlo, di sala 1987’an de, tomargehekê vedike, lê rejîm alavên wî hemû desteser dike. Şêxo li Qamişlo li navendek hunerî zarok û xortan hînî muzîk û sitranan dike. Bi taybetî sitranên gelerî û sirûdên netewî û welatparêziyê fêr dike.
Şêxo di 9’ê Adara sala 1989’an de di 41 saliya xwe de çû ser dilovaniya xwe. Hunermendê ku di dilê Kurdistaniyan de cihê xwe çêkiriye, ji aliyê nêzî 70 hezar kesî ve oxirî rêça dawî hate kirin.
Xelat
